sunnudagur, 24. júní 2007

Ferðasagan já...

Fimmtudagur

Við lögðum af stað á fimmtudagsmorgni og ókum sem leið lá vestur í Hrútafjörð. Þar fórum við yfir Laxárdalsheiði en gerðum svo stutt stopp í Búðardal. Ókum smá hring í plássinu og enduðum niðru í fjöru þar sem ég gerði smá tilraunir til að taka "listrænar" ljósmyndir. Þessi mynd af fuglunum átti hins vegar ekki að vera listræn...


Áfram héldum við og stoppuðum næst í Bjarkarlundi þar sem við borðuðum nýveidda bleikju, eldaða af ítölskum kokki staðarins. Eftir matinn fékk Valur sér kaffi og ég fékk te úr þeim stærsta bolla/könnu sem ég hef nokkru sinni drukkið úr. Svo héldum við áfram að þræða firði og heiðar og alls staðar var sérlega fallegt. Við stoppuðum hvað eftir annað til að taka myndir og teygja úr okkur. Valur er mikill áhugamaður um fossa og sést hér fyrir framan eitt stykki foss sem ég get ómögulega munað nafnið á núna í augnablikinu.


Við ókum yfir Dynjandisheiði

og þar var útsýnið ekki amalegt.


Svo skoðuðum við fossinn Dynjanda og teknar voru myndir...


Til Þingeyrar komum við um áttaleytið og vorum þá búin að vera á ferðinni í tíu tíma.



Leituðum að húsinu sem Hjörtur bróðir Vals og Guðbjörg konan hans eru nýbúin að festa kaup á og fundum það.



Hins vegar hafði gestgjöfunum seinkað og við þurftum að bíða aðeins eftir þeim. Eftir að hafa rúntað um staðinn lögðum við bílnum niðri í fjöru og biðum hin rólegustu. Svo birtust þau hjón og Guðbjörg eldaði dýrindis mat handa okkur.

Föstudagur

Eftir morgunmat og sundferð fórum við með Hirti og Guðbjörgu til Ísafjarðar en þar er Guðbjörg fædd og uppalin. Mér fannst gaman að sjá sumarhúsabyggðina fyrir utan bæinn og svo skoðuðum við húsin í Neðstakaupstað



og sjóminjasafnið þar sem þennan loftskeytaklefa var meðal annars að finna.


Við fengum okkur að borða í bakaríi og rúntuðum svo um bæinn og skoðuðum þónokkur af þeim gömlu húsum sem þar er að finna. Mörg þeirra er búið að gera upp og er mikil prýði að þeim. Svo ókum við í gegnum Hnífsdal (þar sem Hjörtur og Guðbjörg kynntust á balli í félagsheimilinu fyrir X mörgum árum síðan). Kirkjugarðurinn í Hnífsdal vakti athygli okkar enda stendur hann á frekar óvenjulegum stað úti við sjóinn.



Áfram héldum við til Bolungarvíkur. Þar skoðuðum við Valur sjóminjasafnið að Ósvör en þar hafa heimamenn reist nýja "gamla" verbúð sem sýnir hvernig þetta var allt í gamla daga. Hér sést Valur við spil sem notað var til að draga sexæringinn upp í fjöru:


Eftir að hafa skoðað Bolungarvík ókum við aftur til Ísafjarðar og þaðan fórum við Valur til Flateyrar en þar var hann að líta fornar slóðir. Hafði einhvern tímann á unglingsárum unnið eitt sumar þar í fiski og að sjálfsögðu var nauðsynlegt að kíkja á "pleisið". Þegar hér var komið sögu voru rigningarskúrar og þungt yfir og hefur það sjálfsagt ekki hjálpað til við skynjun mína á þorpinu. En mér fannst það hálf nöturlegt eitthvað, mikið af húsum í niðurníslu (sbr. þetta hér en þarna bjó Valur á verbúð hérna í den)



og ekki margt að sjá fyrir utan gíðarlegan snjóflóðavarnargarð og minnismerki um fórnarlömb snjóflóðsins sem féll 1995.



Þegar við komum aftur til Þingeyrar var Hjörtur byrjaður að rífa utan af bíslaginu sem svo er kallað en markmiðið hjá þeim er að gera húsið upp í sinni upprunalegu mynd og í því felst að rífa bíslagið (ef einhver skyldi vera að velta því fyrir sér hvað bíslag er þá þýðir það yfirbyggður inngangur eða eitthvað í þá áttina).


Eftir kvöldmat fórum við svo út að ganga í góða veðrinu.

Laugardagur

Hjörtur og Guðbjörg héldu áfram að rífa bíslagið af húsinu



en við Valur skelltum okkur í sund á Suðureyri við Súgandafjörð. Þangað fannst mér mjög sérstakt að koma, þetta er pínulítið þorp með nánast ekkert undirlendi og gamall flugvöllur kúrir uppi í hlíðinni.




Þar hafði Valur þurft að lenda í sjúkraflugi þegar hann var að leysa héraðslækninn á Patreksfirði af eftir fimmta árið í læknisfræðinni. Skyggnið hafði ekki verið gott og hélt hann að flugmaðurinn væri á leiðinni inn í fjallið hreint og beint en allt gekk það nú vel.
Hér sit ég á bekk við flugvallarendann :-)



Sundlaugin var ágæt þó hún væri svolítið "þreytt" og vorum við eina fólkið í lauginni framan af. Þar var líka heitur pottur og var vatnið í honum vel heitt. Sundlaugarvörðurinn kom svo með kaffi handa okkur, þannig að það væsti ekki um okkur í pottinum. Yfir okkur sveimuðu hrafnar og uppi í hlíðinni fyrir ofan sundlaugina voru kindur á beit. Skemmtilega speisað allt saman einhvern veginn. Eftir sundið vorum við orðin glorhungruð en eini veitingastaðurinn á staðnum var lokaður og bensínsjoppan freistaði ekki, svo við renndum aftur til Ísafjarðar og borðuðum taílenskt skyndifæði. Fórum svo á bókasafnið og sátum dágóða stund inni í þeirri vinalegu byggingu sem áður hýsti sjúkrahúsið og glugguðum í blöð og tímarit.



Á leið til Þingeyrar ókum við út Dýrafjörð og kíktum að Núpi þar sem heljarinnar skólabyggingar standa víst auðar núna. Skoðuðum garðinn Skrúð



þar sem brjálaður þröstur gerði margar atlögur að höfðinu á mér en hann var víst bara að verja hreiðrið sitt. Hef lent í þessu með kríur en ekki þresti. Því miður flaug hann svo hratt að hann náðist ekki á mynd...



Eftir smá pásu heima í húsi drifum við okkur aftur út, í þetta sinn ókum við uppá Sandafell, sem er fjallið fyrir ofan Þingeyri, en þar uppi er endurvarpsstöð og frábært útsýni til allra átta. Þar fengum við ýmis veðursýnishorn, meðal annars var blankalogn og sjóðheitt í smá stund og þá var upplagt að fá sér smá kríublund.



Þegar við komum aftur niður í bæinn var Guðbjörg að klippa fíflablöð til að nota í salat.



Hún er frábær kokkur (eins og Valur en í þetta sinn slapp hann alveg við eldamennskuna) og sérstaklega hugmyndarík þegar kemur að salötum. Vildi að ég hefði þó ekki væri nema smá af hennar hæfileikum í salat-deildinni. Finnst nefnilega salöt svo góð. Eftir matinn fórum við út að ganga, meðal annars niður á bryggju þar sem við hittum mann sem var að koma í land. Hafði hann smíðað bátinn sinn eftir teikningu sem hann fann á netinu og tók það bara einn og hálfan dag.

Sunnudagur

Nú var komið að heimferð og lögðum við í hann um níuleytið til að hafa tímann fyrir okkur. Ákváðum að fara aðra leið heim og fórum Djúpið sem kallað er. Í gegnum Ísafjarðarkaupstað og þaðan til Súðavíkur þar sem við skoðuðum minnismerki um snjóflóðið 1995. Ekki laust við að við yrðum hálf döpur í bragði enda margir sem fórust þarna, alveg eins og á Patreksfirði.



En rétt hjá minnismerkinu var þessi fallega fíflabreiða og minnti á að alltaf birtir til um síðir.



Við sáum eynna Vigur úr fjarlægð



og margt fleira bar fyrir augu, svo sem þennan bílakirkjugarð



sem var við sveitabæ í ónefndum firði (þessir firðir renna allir saman í höfðinu á mér).

Síðasta myndin var tekin þar sem við borðuðum nestið okkar, áður en farið var yfir Steingrímsfjarðarheiði.



En svo brunuðum við áfram, yfir heiðina og framhjá Hólmavík en stoppuðum í Staðarskála til að fá okkur í gogginn. Ókum svo nánast án þess að stoppa alla leið heim en akstursskilyrðin voru reyndar ekki góð því við mættum hundruðum bíla á leiðinni. Allir að koma frá Akureyri þar sem hafði verið margmenni um helgina, á bíladögum ofl. Það gekk þó slysalaust sem betur fer. Heim komum við, átta tímum eftir brottför frá Þingeyri, og var ég aldeilis fegin að komast út úr bílnum. En ferðin var virkilega skemmtileg og við eigum örugglega eftir að fara fljótlega aftur vestur. Þurfum náttúrulega að fylgjast með því hvernig framkvæmdunum við húsið miðar :-)

mánudagur, 18. júní 2007

Allt er vænt sem vel er grænt

Hátt uppi á Dynjandisheiði fann ég þessa fallegu mosabreiðu, rétt við hliðina á snjóskafli.

Annars gekk ferðin vestur á firði afskaplega vel og var virkilega skemmtileg. Segi kannski smá ferðasögu seinna :-)

miðvikudagur, 13. júní 2007

Þrátt fyrir að hafa legið í leti í gær

er ég að drepast úr þreytu og óupplögðheitum í dag. Kannski ég hafi bara verið of mikið úti í sólinni í gær og það sé ástæðan fyrir því hvað ég er lufsuleg í dag. Verð þó að viðurkenna að ég er að drepast úr strengjum eftir æfinguna í fyrradag og það bætir ekki úr skák. Þannig að það saxast lítið á listann sem ég bjó til yfir allt sem ég ætlaði að gera á næstunni, s.s. að fara á bókasafnið og í Bónus, kaupa fleiri sumarblóm og ... (ég er svo sljó í höfðinu í augnablikinu að ég man ekki meira). Er að reyna að herða mig upp í að fara í Bónus því við Valur erum að fara í smá ferðalag á morgun og það þýðir víst ekki að skilja ungana eftir matarlausa í hreiðrinu á meðan. Við ætlum að skella okkur vestur í Dýrafjörð en þar hafa bróðir Vals og mágkona keypt sér gamalt hús sem þau ætla að gera upp. Það verður gaman að koma í þennan landshluta því ég hef aldrei áður komið á Vestfirðina.

þriðjudagur, 12. júní 2007

Þvílíkt lúxuslíf

Já það er aldeilis flott að vera í sumarfríi. Sérstaklega þegar sólin skín og hægt er að vera úti allan daginn. Held að ég hafi varla lyft litlafingri í dag, fyrir utan að þvo nokkrar vélar af þvotti og versla inn fyrir kvöldmatinn.

mánudagur, 11. júní 2007

Lét það eftir mér að sofa út í morgun

Svona í tilefni þess að vera í sumarfríi og svaf til að verða tíu. Síðan leið tíminn í nánast algjörri afslöppun fram eftir degi, eða þar til bóndinn ákvað að fara í leikfimi og ég ákvað að drífa mig með honum. Nokkuð sem hefur ekki gerst í rúmlega eitt ár (eða tvö?) en áður en ég datt ofan í sundlaugina (ef svo má að orði komast) hafði ég í nokkuð mörg ár verið með árskort í líkamsræktarstöðinni. Það er orðið ægilega fínt og flott þarna í Átaki og mörg ný tæki. Ég passaði mig á því að fara bara létt í þetta, hef engan áhuga á að vera að drepast úr strengjum og bólgum í vöðvafestum á morgun. En þetta var bara alveg ágætt. Nú er bara spurningin hvort þetta dugar til að koma mér aftur í reglulega leikfimi... Æskilegast væri auðvitað að synda 3-4 sinnum í viku og fara í ræktina 2-3 í viku. Gallinn er bara sá að mér finnst svo rosalega gott að byrja daginn á því að synda, fara í heitan pott, gufu og kalda sturtu. En skynsemin segir mér að það væri gott að fara líka í leikfimi og styrkja bakið og aðra vöðva sem þjálfast ekki í sundinu. O jæja, þetta kemur víst allt í ljós.

sunnudagur, 10. júní 2007

Þessi stelkur gerði sitt ýtrasta til að afvegaleiða okkur


Stelkur, originally uploaded by Guðný Pálína.

þegar við gengum framhjá hreiðrinu hans í gærkvöldi. Hann var ekki sá eini, það var fullt af þeim þarna, hjá gömlu brúnum yfir Eyjafjarðará.

laugardagur, 9. júní 2007

Komin í sumarfrí í tvær vikur

og bara nokkuð ánægð með það. Hef verið svo óskaplega þreytt eitthvað undanfarið og hressist vonandi við að slappa af með bóndanum sem er líka í fríi. Meiningin er að skreppa vestur í Dýrafjörð seinni partinn í næstu viku, þ.e.a.s. ef allt gengur eftir. Ísak þarf að keppa einn fótboltaleik seint á miðvikudaginn og getur ekki hugsað sér að sleppa honum, svo við förum ekki fyrr en að honum loknum.

Annars fór ég í óvissuferð með kvennaklúbbnum mínum í gær. Held að það sé í annað skipti á ævinni sem ég prófa svoleiðis. Og það var bara mjög gaman. Byrjuðum á því að skoða risastórt fjós að Garði í Eyjafjarðarsveit og það var nú aldeilis fróðlegt. Kýrnar fara sjálfar á þartilgerðan bás til að láta "vélmenni" mjólka sig og flórinn er mokaður af öðru vélmenni. Eftir fjósið var okkur svo ekið örstuttan spotta upp frá veginum og þá áttum við að fara út úr bílnum og í göngutúr. Gengum uppá eitthvað sem er eiginlega ekki fjall en samt hærra en smá hæð og heitir "Hnaus". Skilst að hæðin sé eitthvað um 6-700 metrar. Þetta er lægsta "fjall" við fjörðinn þar sem er gestabók að finna og þaðan er afskaplega fallegt útsýni út Eyjafjörð. Til að kóróna þetta var veðrið alveg dásamlegt. Þegar við sátum uppi á toppnum varð einni okkar að orði að þarna hefði hún komist í samband við sjálfa sig aftur, eftir mikið stress og læti undanfarnar vikur. Svo röltum við niður aftur og settumst í græna lautu. Þar var okkur boðið uppá smurðar samlokur, heimabakað muffins, heilsunammi og kakó úr brúsa. Við borðuðum og spjölluðum dágóða stund áður en við fórum í bæinn aftur. Ég var bara alveg endurnærð eftir að hafa verið svona úti í náttúrunni. Hefði viljað vera með myndavél til að geta fest eitthvað af þessu á filmu en nei, ekki mundi ég nú eftir að taka hana með...

laugardagur, 2. júní 2007

Laugardagur til lukku

Ekki það að nein sérstök lukka hafi elt mig í dag - en engin ólukka heldur... Við byrjuðum daginn á að hreinsa til í okkar nærumhverfi, mættum upp í Lundarskóla klukkan tíu og eyddum næsta klukkutímanum í að tína rusl ásamt fleiri íbúum hverfisins. Það var nú bara svolítið gaman að taka þátt í því að gera hverfið fallegra en það var reyndar ekkert óskaplega mikið rusl. Við slepptum því að vísu að taka þátt í hverfishátíðinni sem fylgdi í kjölfarið, bakið á mér þoldi ekki meira og Valur fór að slá lóðina. Að öðru leyti var tíðindalítið á vesturvígstöðvunum, ég ryksugaði gólfið, þvoði eina vél og gerði tilraun til að fara í bæinn og skoða föt en bar ekkert úr býtum í þeirri ferð. Annað mátti segja um ferð mína í bleika grísinn, þaðan kom ég klyfjuð út. Í þessum skrifuðu orðum er Valur að elda dýrindis máltíð og best að koma sér fram í eldhús til að missa nú ekki af matnum :-)

föstudagur, 1. júní 2007

Kirkja í kvöldsól


Kirkja í kvöldsól, originally uploaded by Guðný Pálína.

Við skruppum smá rúnt í kvöld og myndavélin var með í för. Stoppuðum við Lögmannshlíðarkirkju og hlustuðum á fuglana syngja í kvöldsólinni. Sáum svo fálka niðri við Lónsbakka en því miður náðist hann ekki á mynd.